Fjalar Freyr Einarsson

Fjalar hefur starfað með börnum og unglingum frá árinu 2000 sem kennari og ráðgjafi, með sérhæfingu í krefjandi hegðun nemenda. Hann notar jákvæðan aga og virðingu í samskiptum og leggur áherslu á að mæta þörfum hvers einstaklings, skapa umhverfi þar sem einstaklingar geta þroskast og dafnað á eigin forsendum.

Menntun Fjalars er fjölbreytt  sem öll nýtist í krefjandi verkefnum. Hann lauk kennaraprófi árið 2005, námi í jákvæðri agastjórnun (PMTO) árið 2011 og 60 eininga diplómanámi í jákvæðri sálfræði árið 2019 og mun ljúka MSc gráðu í hagnýtri atferlisgreiningu frá Háskólanum í Reykjavík síðar á þessu ári, sem mun veita honum réttindi til að starfa sem klínískur atferlisfræðingur.

Síðan 2019 hefur hann starfað sem ráðgjafi í grunnskólum í Reykjavík, þar sem hann veitir ráðgjöf og bendir á einstaklingsmiðaðar lausnir fyrir nemendur, foreldra og kennara. Hann hefur einnig unnið með fjölskyldum og félagsþjónustu sveitarfélaga til að bæta samskipti innan fjölskyldna, oft í tengslum við einstaklinga með einhverfu.

Fjalar hefur verið í fararbroddi á sviði skólaforðunar í Reykjavík, þar sem hann hefur leitt teymi sem vinnur að lausnum fyrir börn og ungmenni sem eiga í erfiðleikum með skólasókn.

Auk þess hefur hann reynslu af að vinna með einstaklingum með heilabilun, þar sem hann greinir hegðun og þróar markviss inngrip til að bæta lífsgæði þeirra og til að auðvelda starfsfólki að mæta þörfum viðkomandi.

Fjalar vinnur heildstætt og einstaklingsmiðað með það markmið að bæta lífsgæði og vellíðan þeirra sem hann starfar með, hvort sem um er að ræða börn, ungmenni eða fullorðna.